CEBU CITY - Nagpalabas na ng resolution ang Vice Mayors League of the Philippines-Cebu Chapter na nagdedeklara kay 1969 Miss Universe Gloria Diaz na "persona non grata," at i-ban na itong pumasok sa lungsod ng Cebu, matapos sinabi nito na ang mga Cebuana ay hindi marunong mag-Ingles.

Ayon kay Vice Mayors Laegue of the Philippines President Arlene Zambo ng Toledo City, nagkaisa ang lahat na mga opisyal ng liga para sa pagpalabas ng nasabing resolusyon at mariing kinondena ang diumano'y iresponsableng pahayag ni Diaz laban sa mga Cebuana.

Nakasaad din sa nasabing resolusyon ang pag-demand ng public apology mula sa aktres at dating Miss Universe.

Magugunitang nasaktan at nainsulto ang mga Cebuana sa sinabi ni Diaz na kailangan sa pagsali sa mga international beauty pageant ay may interpreter ang Pilipinas, dahil ang mga Cebuana ay nahirapan sa Ingles.