Nakasamsam ang Bureau of Internal Revenue (BIR) at Philippine National Police (PNP) ng 17 master cases ng ilegal na sigarilyo sa isang operasyon sa Governor Generoso, Davao Oriental.
Ang mga nakumpiskang produkto ay agad na inilagay sa kustodiya ng pulisya at ininspeksyon ng BIR para sa tamang tax assessment.
Batay sa pagsusuri ng Revenue District Office No. 114, tinatayang aabot sa P6.5 milyon ang excise tax liability mula sa mga nasamsam na sigarilyo.
Ang operasyon ay bahagi ng pinaigting na kampanya laban sa ilegal na kalakalan ng sigarilyo na nakakasira sa lehitimong negosyo at nakakapinsala sa kita ng gobyerno.
Ayon sa BIR, lumabag ang mga produkto sa ilang probisyon ng National Internal Revenue Code at sa mga regulasyon hinggil sa tamang rehistro at paglalagay ng revenue stamps.
Binibigyang-diin ng ahensya na ang mga ganitong gawain ay hindi lamang paglabag sa batas kundi banta rin sa kapakanan ng mamamayan.
Sa ngayon, isinasagawa na ang mga legal at administratibong hakbang para sa pagsasampa ng kaso laban sa mga responsable sa pagmamay-ari at pagdadala ng mga ilegal na produkto.
