Nasabat ng mga tauhan ng Philippine National Police (PNP) katuwang ang National Meat Inspection Service (NMIS) ang tinatayang ₱2.3 milyong halaga ng hinihinalang “hot meat” sa isinagawang operasyon sa isang pasilidad sa Marilao, Bulacan.
Ayon sa ulat, isinagawa ang operasyon matapos makatanggap ng impormasyon ukol sa ilegal na pagbebenta ng karne na walang kaukulang dokumento at inspeksyon.
Natagpuan sa lugar ang malaking volume ng karne na pinaghihinalaang hindi dumaan sa tamang proseso ng inspeksyon, na posibleng magdulot ng panganib sa kalusugan ng publiko.
“Ang ganitong uri ng karne ay hindi dapat ibinibenta sa merkado dahil hindi ito dumaan sa tamang pagsusuri. Delikado ito sa kalusugan ng mamimili,” pahayag ng isang opisyal mula sa NMIS.
Inaalam pa ng mga awtoridad ang pinagmulan ng karne at kung sino ang nasa likod ng operasyon. Posibleng maharap sa kasong paglabag sa Republic Act No. 9296 o ang Meat Inspection Code of the Philippines ang mga sangkot.
