Sa ilalim ng passenger fee program na ipinatutupad sa mga pantalan sa buong bansa, umabot na sa mahigit 8 milyong pasahero ang nakinabang sa libreng terminal fee.
Ang programang ito ay partikular na nakatuon sa pagbibigay ng benepisyo sa mga estudyante, senior citizen, persons with disabilities (PWD), at uniformed personnel.
Nabatid na ang kabuuang halaga ng mga terminal fee na hindi na nakolekta mula sa mga nabanggit na sektor ay umabot sa 219 milyong piso.
Sinabi ng PPA na ang nasabing halaga ay naipon mula nang itigil ang koleksyon ng terminal fee noong 2019 hanggang nitong Hulyo ng kasalukuyang taon.
Ang pagpapatigil ng koleksyon ay naglalayong magbigay ng pinansyal na ginhawa sa mga pasahero na kabilang sa mga espesyal na grupo.
Ang pagbabago sa patakaran ay naganap mula sa pagbibigay ng diskwento tungo sa full exemption o ganap na paglilibre sa pagbabayad ng terminal fee at ito ay batay sa PPA Administrative Order 4-2019.
Nilalayon nito na gawing mas inklusibo at abot-kaya ang transportasyon sa dagat para sa mas maraming Pilipino.
Ayon kay PPA General Manager Jay Santiago, layunin ng kanilang ahensya na gawing mas abot-kaya ang maritime transport para sa mga estudyante, senior citizens, PWD, at uniformed personnel. Ito ay bilang pagkilala sa kanilang mahalagang kontribusyon sa bansa at bilang paraan upang mapagaan ang kanilang mga gastusin sa paglalakbay.
