Ipapatawag ng Land Transportation Office (LTO) ang mga organizer ng 2026 BOSS Ironman Mindanao Cup sa General Santos City matapos maiugnay ang kanilang aktibidad sa paglabag sa batas-trapiko.
Ayon sa ulat, ilang motorista na lumahok sa endurance ride ay gumamit ng illegal blinkers at sirena na nakalilito sa ibang driver at nagdulot ng panganib sa kalsada.
Ang insidente ay lalo pang naging kontrobersyal matapos masawi ang isang bata sa aksidenteng kinasangkutan ng motorsiklong kasali sa naturang event.
Ang BOSS Ironman Mindanao Cup ay isang 36-hour endurance ride na layong itaguyod ang turismo at responsible riding, ngunit ngayong taon ay binatikos dahil sa kakulangan ng mahigpit na regulasyon.
Nabatid na noong Nobyembre 2025 ay nag-anunsyo ang organizer ng mas mahigpit na safety measures, subalit hindi ito naipatupad nang maayos.
Posibleng masuspinde ang permit ng event at maharap sa administrative sanctions ang mga organizer.
Nananawagan ang ilang sektor na higpitan ang regulasyon sa malalaking motorcycling events upang maiwasan ang kaparehong trahedya sa hinaharap.
