Isinailalim ng Commission on Elections (COMELEC) sa ilalim ng “red category” ang labindalawang (12) bayan sa Bangsamoro Autonomous Region in Muslim Mindanao (BARMM).
Ito ay may direktang kaugnayan sa nalalapit na isasagawang kauna-unahang BARMM Parliamentary Elections o Halalan sa Parlamento ng BARMM.
Kasama sa ilalim ng “red category” na inilabas ng COMELEC ang anim (6) na munisipalidad na matatagpuan sa lalawigan ng Lanao del Sur.
Ang mga bayang ito ay kinabibilangan ng Masiu, Lumba-Bayabao, Poona-Bayabao, Tamparan, Taraka, at Mulondo.
Bukod pa rito, napasama rin sa kategoryang ito ang lima (5) pang bayan na kabilang sa Maguindanao del Sur, partikular na ang Paglat, Pandag, Buluan, Datu Paglas, at Mangudadatu. At panghuli, isang (1) bayan naman sa lalawigan ng Basilan ang nakasama rin sa listahan, ang Al-Barka.
Ayon sa pahayag ni COMELEC Chairman George Erwin Garcia, ang bilang na ito ng mga bayan na nasa “red category” ay maaaring mabawasan o madagdagan pa depende sa magiging sitwasyon habang papalapit ang mismong araw ng eleksyon.
Nilinaw rin ni Chairman Garcia na sa kasalukuyang panahon, ang sitwasyon sa buong BARMM ay nananatiling ‘generally peaceful’ o sa pangkalahatan ay mapayapa.
Dahil dito, wala pa umanong plano ang komisyon na isailalim ang anumang partikular na lugar sa rehiyon sa ilalim ng direktang COMELEC control.
