Gumagawa si Dominican priest at molecular biologist Fr. Nicanor Austriaco ng oral vaccine na gawang Pinoy at ito ay epektibo laban sa COVID-19 at mga variants nito.
Sinabi ni Austriaco na miyembro rin ng OCTA Research Group na ang dalawang bakuna na ang isa ay laban sa original virus at ang isa ay para sa ibang variant mula sa yeast o pampaalsa sa mga tinapay.
Ang nasabing yeast-base vaccine aniya ay gagawa ng mas maraming protina na siyang magdudulot ng magandang immune response laban sa virus.
Ang nasabing vaccine aniya ay isang ordinaryong kapsula na maaaring ilagay sa tubig, gatas o kahit anong uri ng inumin.
Hindi gaya ng ibang bakuna ang kaniyang yeast-based vaccine ay hindi sensitibo sa lamig ng panahon.
Nakatakda rin silang magsagawa ng testing ng nasabing bakuna sa University of Sto. Tomas sa Manila kung saan susubukan muna ito sa daga at kanilang oobserbahan kung magkakaroon itong ng immune response sa anumang virus.
Umaasa ito na pagdating sa Disyembre ay tuluyan ng maperpekto ang bakuna at makagawa ng mas maraming uri nito.
Si Austriaco ay mayroong PhD mula sa Massachusetts Institute of Technology at nagsanay sa yeast expert sa loob ng 25 taon.
