Naitala ang pagbaha sa ilang pangunahing lansangan sa Metro Manila nitong Huwebes ng hapon, bunsod ng patuloy na pag-ulan dulot ng masamang panahon.
Sa Mandaluyong City, iniulat ang bahang gutter-deep sa EDSA Shaw Tunnel northbound.
Bagama’t may tubig sa kalsada, nananatiling passable o madaanan ito ng lahat ng uri ng sasakyan, ayon sa ulat ng lokal na awtoridad.
Samantala, sa Makati City, bahagyang pagbaha rin ang naobserbahan sa EDSA Magallanes Split southbound.
Tulad ng sa Mandaluyong, abot-gutter ang lalim ng tubig ngunit hindi ito hadlang sa daloy ng trapiko.
Nagpaalala ang mga kinauukulan sa mga motorista na magdoble-ingat sa pagmamaneho, lalo na sa mga lugar na may bahagyang pagbaha.
Pinapayuhan din ang publiko na patuloy na subaybayan ang mga abiso mula sa MMDA at lokal na pamahalaan kaugnay ng lagay ng panahon at trapiko.
