KALIBO, Aklan – Nakaantabay sa Boracay ang Department of Health (DOH)-Region VI upang i-monitor ang nasa 177 Chinese national mula sa Wuhan, China, na kasalukuyang nasa isla.

Ayon kay Malay Acting Mayor Frolibar Bautista, sakaling makaramdam ng flu-like symptoms ang mga dayuhan batay sa minomonitor na sintomas ng Novel Coronavirus (N-Cov) ay agad silang ilalayag papuntang mainland Malay upang dalhin sa pagamutan sa bayan ng Kalibo.

-- Advertisement --

Nakapasok aniya sa isla ang nasabing mga turista dahil negatibo ang mga ito sa criteria ng World Health Organization na matukoy na may N-Cov at nakapasa sila sa Bureau of Quarantine sa Kalibo International Airport.

Habang pinoproseso ang kanilang pag-uwi sa China ay todo-bantay ang DOH kung saan, nakahanda na ang mga ambulance vehicle na kanilang sasakyan papuntang Kalibo sakaling mamonitor ang mga ito ng DOH na may flu-like symptoms sa iniugnay sa N-Coronavirus.

Samantala, inaasahan na ng opisyal na maaapektuhan ang tourist arrival sa tanyag na isla dahil isa ang mga turistang Chinese na nangunguna sa listahan ng mga bumibisita sa Boracay.