Ipinahayag ni AKBAYAN Party-list Representative Chel Diokno ang kanyang malalim na pagkabahala hinggil sa umano’y pagiging “beholden” o pagkakaroon ng utang na loob ng mga Sangguniang Kabataan (SK) Council sa mga barangay captain.
Ang partikular na pinoproblema ni Diokno ay ang impluwensya ng mga barangay captain, lalo na pagdating sa usapin ng paggamit at pamamahala ng pondo ng SK.
Sa deliberasyon at pagtalakay ng panukalang ₱287.5-bilyong budget para sa Department of the Interior and Local Government (DILG) sa taong 2026, binanggit ni Diokno ang isang pag-aaral na isinagawa ng Ateneo de Manila University noong taong 2022.
Ayon sa pag-aaral na ito, nananatili pa rin ang kontrol ng mga barangay captain sa pondo ng Sangguniang Kabataan, sa kabila ng malinaw na nakasaad sa batas na ang SK ay nararapat na magkaroon ng sarili nitong bank account at dapat na may awtonomiya o kalayaan sa pagdedesisyon.
Ibig sabihin, bagama’t mayroon nang batas na naglalayong protektahan ang awtonomiya ng SK, hindi pa rin ito ganap na naipapatupad sa maraming lugar.
Kinumpirma naman ni Department of the Interior and Local Government (DILG) Secretary Jonvic Remulla ang mga nabanggit na pagkabahala.
Ayon kay Secretary Remulla, isa sa mga malalaking problemang kinakaharap ng mga Sangguniang Kabataan ay ang mababang partisipasyon ng mga SK officials matapos ang kanilang pagkahalal.
Ito ay nagdudulot ng negatibong epekto sa kanilang kakayahang gampanan ang kanilang mga tungkulin.
