CENTRAL MINDANAO- Binawian ng buhay ang isang kasapi ng Philippine National Police (PNP) sa pamamaril sa lalawigan ng Maguindanao.
Nakilala ang biktima na si Police Corporal (CPL) Abdulraman Bantuas at nakatalaga sa Mamasapano Municipal Police Station (MPS) sa Mamasapano Maguindanao.
Ayon kay Maguindanao Police Provincial Director Colonel Arnold Santiago na natutulog lamang ang biktima sa kanyang tahanan sa Brgy Manungkaling Mamasapano Maguindanao ng bigla itong pasukin ng mga hindi kilalang suspek at pinagbabaril gamit ang kalibre.45 na pistola.
Mabilis namang tumakas ang mga suspek lulan ng dalawang motorsiklo patungo sa liblib na lugar sa bayan ng Mamasapano.
Patay on the spot si Cpl Bantuas nang magtamo ng tama ng bala sa kanyang ulo at dibdib.
Sa ngayon ay nagpapatuloy ang imbestigasyon ng Mamasapano MPS sa pamamaslang sa kanilang kasamahan.
