Nakahanda na ang organizers ng 20th Asian Games sa Nagoya, Japan para sa kanilang pormal na opening ceremony.
Gaganapin ang pormal opening ng dakong ala-6 ng gabi ngayong Sabado, Setyembre 19 oras sa Pilipinas.
Inamin ni Nagoya mayor Ichiro Hirosawa na siya ring deputy president ng mga laro ay naging malaking hamon nila ang pag-ulan at pagdaan ng mga bagyo.
Noong nakaraang mga linggo ay dinaanan ng malakas na bagyo ang nasabing bansa bukod pa sa may inaasahan nilang panibagong bagyo na paparating.
Sa unang plano nila ay magtayo ng athlete’s village subalit dahil sa pagtitipid ay gumamit na lamang sila ng mga container housing, cruise ship at mga hotels para doon na tumuloy ang mga atleta.
Bagamat nagkaroon ng cost-cutting sa budget ay inamin ni Hirosawa na lumobo din ang kanilang gastusin.
Aabot sa mahigit 17,000 na mga atleta at mga staff mula sa iba’t-ibang bansa sa Asya ang magpapaligsahan.
Hindi naman makakadalo sa opening ceremony si Japanese Prime Minister Sanae Takaichi.
Nakakalat pa rin ang mahigit na 10,000 na mga kapulisan para tiyakin ang seguridad sa lugar.
Mayroong 43 sports events ang lalahukan ng mga atleta sa dalawang linggong sporting events.
Bukod sa mga sports na boxing, crickets , football, golf, gymnastics,table tennis, weightlifting, tennis, badminton ay mayroong eSports, break dancing at BMX biking para lalong makaakit sa mga kabataan.
Mayroong 11,000 na atleta at 6,000 na officials ang lalahok mula sa 45 na bansa at teritoryo ang maghaharap.
