Tiniyak ng Philippine National Police (PNP) ang kanilang lubos na suporta at pakikipagtulungan sa kasalukuyang isinasagawang masusing inspeksiyon ng Department of Public Works and Highways (DPWH) sa mga pangunahing proyekto na may kinalaman sa pagkontrol sa mga pagbaha sa iba’t ibang bahagi ng bansa.
Ito ay isang direktang tugon sa panawagan na ipinaabot ni Pangulong Ferdinand R. Marcos Jr., na nananawagan para sa isang tapat, maayos, at walang bahid ng korapsyon na pagpapatupad ng lahat ng proyektong pang-imprastraktura ng pamahalaan.
Ayon kay Acting Chief PNP, Police Lieutenant General Jose Melencio Nartatez Jr., ang lahat ng unit ng pulisya sa buong bansa ay nakahanda at nakaalerto upang magbigay ng seguridad at proteksyon habang ang mga tauhan ng DPWH ay aktibong nagsasagawa ng kanilang inspeksyon sa iba’t ibang flood-mitigation site o mga lugar kung saan isinasagawa ang mga proyekto upang maibsan ang epekto ng pagbaha.
Idinagdag pa ni Nartatez na mahalaga ang papel ng PNP sa pagtiyak ng kaligtasan hindi lamang ng publiko, kundi pati na rin ng mga nasabing proyekto na may malaking maitutulong sa mga komunidad sa kanilang pagharap at pagtugon sa mga problema at hamon na dulot ng malawakang pagbaha.
Kaugnay nito, nagbigay na ng direktiba si Nartatez sa lahat ng regional at lokal na tanggapan ng pulisya na agarang makipag-ugnayan at makipag-coordinate sa DPWH at sa mga lokal na pamahalaan upang masiguro ang isang maayos, mapayapa, at ligtas na pagbisita at inspeksyon sa lahat ng flood-control site na sakop ng kanilang responsibilidad.
Ang koordinasyon na ito ay kinakailangan upang maiwasan ang anumang aberya o insidente na maaaring makasagabal sa inspeksyon.
