Nanawagan si Ferdinand “Bongbong” Marcos Jr. sa mga Pilipino na yakapin ang pag-asa, pagkakaisa, at malasakit habang ipinagdiriwang ng bansa ang Easter Sunday, na sumisimbolo sa muling pagkabuhay ni Hesukristo at pagtatapos ng Semana Santa.
Sa kanyang mensahe, sinabi ng Pangulo na nakikiisa siya sa buong sambayanang Pilipino sa pagdiriwang ng Pasko ng Pagkabuhay, na aniya’y “tagumpay na rurok ng Semana Santa at banal na pagpapahayag ng muling pagkabuhay ni Kristo.”
Ipinagdiriwang ng mga Kristiyanong Pilipino ang araw na ito nang may malalim na debosyon at kagalakan sa buong bansa bilang paggunita sa pagkabuhay ni Hesukristo matapos ang isang linggong pagninilay at pag-aalay.
Binigyang-diin ng Pangulo na ang okasyon ay sumisimbolo ng tagumpay laban sa kawalan ng pag-asa at panibagong sigla sa pamamagitan ng pananampalataya. Hinikayat niya ang mamamayan na isabuhay ang mga pagpapahalagang ito sa pamamagitan ng kabutihan at sama-samang pananagutan upang makabuo ng mas matatag at nagkakaisang bansa.
Ayon pa sa Pangulo, ang walang lamang libingan ay patunay na ang buhay ay nanaig laban sa kamatayan at ang pag-asa ay higit sa pangamba.
Hinimok din niya ang mga Pilipino na magtulungan sa pagbuo ng isang bansa kung saan likas ang kabutihan at ang pagkakaisa ang nagsisilbing lakas ng bawat isa. Dagdag niya, sa pamamagitan ng pananampalataya, pagmamahal sa bayan, at iisang mithiin, walang pagsubok ang hindi malalampasan.
Binigyang-diin ni Marcos ang hangaring maitaguyod ang “Bagong Pilipinas” kung saan ang malasakit at pag-aaruga sa kapwa ang patuloy na maglalarawan sa pagkatao ng bawat Pilipino.
Dagdag pa niya, sa paglipas ng mga henerasyon, ipinapaalala ng Pasko ng Pagkabuhay na ang sakripisyo ay hindi nasasayang at ang paghihirap ay simula ng panibagong pag-asa.
Sa huli, nanawagan ang Pangulo sa bawat Pilipino na bumangon na may panibagong layunin, matatag na pag-asa, at malalim na pananagutan sa isa’t isa, at isabuhay ang diwa ng Pasko ng Pagkabuhay sa araw-araw sa pamamagitan ng malasakit, pagkakawanggawa, at pagkakaisa.
