Pinatitigil na ng Malacañang ang UP-OCTA Research Team sa pagsasapubliko ng mga rekomendasyon kaugnay sa COVID-19.
Pahayag ito ng Malacañang matapos irekomenda ng UP-OCTA na muling magpatupad ng mas mahigpit na quarantine classification o localized lockdown sa Bauan sa Batangas, Calbayog sa Western Samar at General Trias sa Cavite dahil sa mataas na kaso ng COVID-19.
Sinabi ni Presidential Spokesman Harry Roque, mas makabubuti kung idadaan ang kanilang rekomendasyon sa pribadong pamamaraan para hindi naman napapangunahan ang Inter-Agency Task Force for the Management of the Emerging Infectious Diseases (IATF).
Ayon kay Sec. Roque, dapat ding alalahanin ng mga eksperto na ang mga quarantine classifications ay karaniwang iniaanunsyo mismo ni Pangulong Rodrigo Duterte.
“I wish they would refrain from making these recommendations publicly. They can probably endorse or course their recommendations privately with the IATF nang hindi naman po napapangunahan, highlighting the fact that classifications are normally announced by the President himself,” ani Sec. Roque.
Gayunman, binibigyang-diin ni Sec. Roque na nagpasasalamat pa rin ang Malacañang sa tulong ng UP-OCTA.
“I really appreciate the efforts po of OCTA Research Team in helping us monitor COVID cases. Pero ni-request ko na po sa kanila na to desist from making recommendation on classification kasi talagang trabaho naman po yan ng eksperto. And I understand although they have one or two epidemiologists, it is still not the same number of experts working with the IATF. hindi lang po sa DOH.”
