Naglabas ng paalala ang pamunuan ng Manila North Cemetery kaugnay ng nalalapit na paggunita sa All Souls Day o Undas 2025, upang masiguro ang kaayusan at kaligtasan ng mga dadalaw sa sementeryo.
Hiniling ng pamunuan sa mga pet owners na iwasang magsama ng alagang hayop sa loob ng sementeryo sa panahon ng Undas. Layunin nitong maiwasan ang abala at posibleng insidente sa dami ng taong inaasahang dadalo.
Mahigpit na ipinagbabawal ang pagdadala ng baril, patalim, at iba pang uri ng armas sa loob ng sementeryo. Magkakaroon ng checkpoints at inspeksyon upang matiyak ang seguridad ng lahat.
Pinapayuhan ang publiko na isagawa ang paglilinis ng puntod hanggang Oktubre 27 lamang. Pagkatapos nito, hindi na papayagan ang anumang aktibidad ng paglilinis upang maiwasan ang pagsisiksikan.
Hindi rin papayagan ang overnight stay o magdamagang dalaw sa loob ng sementeryo. Ang mga bisita ay inaasahang sumunod sa itinakdang oras ng pagbisita upang mapanatili ang kaayusan.
Simula Oktubre 28, pansamantalang ititigil ang mga aktibidad ng libing sa Manila North Cemetery. Muling ipagpapatuloy ang mga ito pagkatapos ng Undas.
Ang mga paalalang ito ay bahagi ng paghahanda ng lokal na pamahalaan upang masiguro ang maayos, ligtas, at mapayapang paggunita sa Araw ng mga Patay. Inaasahan ang kooperasyon ng publiko sa pagsunod sa mga alituntunin.
Ang Manila North Cemetery ang pinakamalaking sementeryo sa bansa na may 54 ektarya at himlayan ng ilang kilalang personalidad.
