NAGA CITY- Sugatan ang isang lalaki matapos pagsasaksakin sa Barangay San Juan, Magarao, Camarines Sur.
Kinilala ang biktima na si Rommel Orpia, 45-anyos, residente ng Barangay Sta Lucia, Magarao, Camarines Sur.
Sa nakalap na impormasyon ng Bombo Radyo Naga sa Camarines Sur Police Provincial Office (CSPPO) napag-alaman na habang kausap ng biktima ang kaibigan nito na si Domingo Caringal, 45-anyos nang lapitan umano ito ng suspek na kinilala namang si Arnel Baldonasa, 43-anyos residente ng nasabing lugar.
Base sa imbestigasyon, kinumpronta umano ito ng suspek kung saan nauwi ito sa mainit na argumento dahil sa matagal ng alitan.
Nabatid na bigla na lamang umanong sinaksak ng nasabing suspek ang biktima, resulta upang magtamo ito ng tama sa katawan na agad namang dinala sa ospital.
Kaugnay nito, agad namang nagsagawa ng hot pursuit operation ang mga otoridad resulta upang maaresto si Baldonasa, sa kanilang mismong bahay.
Sa ngayon nasa kustodiya na ng mga otoridad ang suspek para sa karampatang disposisyon.
