Tiniyak ng Philippine National Police (PNP) ang mas mahigpit na pagpatrolya sa gabi kasunod ng mga nararanasang rotational brownout sa iba’t ibang bahagi ng bansa.
Sa isang panayam, sinabi ni PNP Chief Jose Melencio Nartatez na inatasan na niya ang mga regional at provincial director na palakasin ang foot at mobile patrols, partikular sa mga residential area tuwing oras ng pagkawala ng kuryente.
“I have already directed all regional and provincial directors to intensify foot and mobile patrols specifically in residential hubs during the scheduled power interruptions at night,” ani Nartatez.
Ayon sa PNP Chief, posibleng tumaas ang insidente ng krimen gaya ng “akyat-bahay” at iba pang street crimes kapag madilim ang paligid dahil sa brownout.
Pagtitiyak pa ng PNP na mananatiling bukas at operational ang Unified 911 hotline sa kabila ng power interruptions, sa tulong ng backup power systems.
“Our command centers and emergency hotlines, such as the Unified 911, will remain fully operational through back-up power systems to ensure that every call for help is answered,” pahayag ni Nartatez.
Matatandaang isinailalim kamakailan ng National Grid Corporation of the Philippines (NGCP) sa red alert ang buong Luzon.
Dahil dito, tinatayang aabot sa mahigit 320,000 customer ang maaaring maapektuhan ng rotational brownouts sa mga lalawigan ng Bulacan, Cavite, Laguna, Metro Manila, Pampanga, Quezon, at Rizal.
