Nagbabala ang Commission on Human Rights (CHR) sa publiko kaugnay ng pag-uupload ng larawan ng mga bata sa social media, kasunod ng patuloy na pagtaas ng kaso ng Online Sexual Abuse and Exploitation of Children (OSAEC) sa bansa.
Ayon kay CHR Focal Commissioner for Child Rights Atty. Beda Epres, kaya na ng teknolohiya at artificial intelligence na manipulahin ang mga larawang ina-upload sa internet. Kung kaya’t hinikayat niya ang mga magulang na iwasan ang paglalantad ng larawan ng kanilang mga anak online.
Ang babala ay kasunod ng kaso ng isang content creator na si Queen Hera, na nadiskubreng ibinebenta online ang videos na gamit ang larawan ng kanyang anak.
Base sa datos ng UNICEF, triple ang itinaas ng OSAEC cases mula 1.3 million noong 2020 patungo sa mahigit 2.7 million noong 2023. Karamihan sa mga suspek ay mismong kamag-anak o magulang pa ng mga biktima.
Ayon kay Epres, isa sa mga humahadlang sa kanilang imbestigasyon ay ang takot o pagprotekta ng mga magulang sa mga pamilyang sangkot. Binigyang-diin niya ang papel ng komunidad sa pag-uulat ng kahina-hinalang aktibidad sa CHR o PNP.
Samantala, ‘poverty’ ang pangunahing dahilan kung bakit nasasangkot ang ilang pamilya sa OSAEC, ayon sa mga nakalap ng CHR.
May maling paniniwala din aniya ang ilan na basta’t hindi pisikal na hinahawakan ang bata ay hindi ito abuse — bagay na kinokontra ng CHR, at iginiit ang matinding epekto ng psychological trauma sa bata.
Hinikayat din ni Epres ang muling pagsusuri sa Anti-OSAEC and Anti-CSAEM Law (RA 11930), lalo na ang probisyon ukol sa reintegration ng mga biktima.
Marami kasi sa mga biktima ang ayaw ipakulong ang kanilang mga magulang, ngunit walang sapat na alternatibong paraan ng pag-aalaga para sa kanila matapos ang insidente.
