Naglabas ng babala ang Bangko Sentral ng Pilipinas (BSP) kaugnay ng pagkalat ng mga pekeng dokumento na nagpapanggap na opisyal na inilabas ng BSP o ng mga kinatawan nito.
Ayon sa advisory, ang mga mapanlinlang na dokumentong ito ay maaaring naglalaman ng logo ng BSP at peke o pinekeng pirma upang linlangin ang publiko at makakuha ng ilegal na benepisyo gaya ng pera o sensitibong impormasyon.
Nanawagan ang BSP sa publiko na maging mapagmatyag at huwag basta-basta magtiwala sa anumang dokumento o komunikasyon na may kaugnayan sa mga transaksiyong pinansyal. Mahigpit na pinapayuhan ang lahat na beripikahin muna ang pagiging lehitimo ng mga dokumento bago kumilos.
Patuloy ang BSP sa pagbibigay ng paalala upang maprotektahan ang mamamayan laban sa mga panlilinlang na maaaring magdulot ng pinsala sa kanilang seguridad at kabuhayan.
