Inihayag ng Bureau of Immigration (BI) na kasalukuyan nilang tinutukoy kung sino-sino sa 33 personalidad na isinailalim sa Immigration Lookout Bulletin Order (ILBO) ang nasa labas na ng bansa.
Ayon kay BI spokesperson Dana Sandoval, inaasahang malalaman ngayong araw ang listahan ng mga indibidwal na wala sa Pilipinas.
Ang mga nasabing personalidad ay iniimbestigahan kaugnay ng umano’y maanomalyang flood control projects na nagkakahalaga ng bilyong piso.
Kabilang sa mga pangalan sa ILBO ang ilang mambabatas, dating opisyal ng pamahalaan, at mga kasalukuyang nasa serbisyo publiko.
Layunin ng ILBO na mabantayan ang galaw ng mga sangkot habang isinasagawa ang mas malalim na imbestigasyon.
Ang ILBO ay isang mekanismo ng Department of Justice (DOJ) na ipinapadala sa Bureau of Immigration upang alertuhin ang mga immigration officer sa mga indibidwal na may kinahaharap na imbestigasyon o kaso.
Hindi ito kapareho ng hold departure order, ngunit nagsisilbing babala upang masubaybayan ang paglabas ng bansa ng mga nasasangkot.
Ang imbestigasyon ay pinangungunahan ng Independent Commission for Infrastructure (ICI), na nagsusuri sa mga flood control projects na umano’y overpriced, ghost projects, o hindi tumutugma sa aktwal na implementasyon.
Ilan sa mga proyekto ay sinasabing pinondohan ng malalaking halaga ngunit walang sapat na ebidensya ng aktwal na konstruksyon.
