Patuloy na lumalakas ang Bagyong Uwan habang ito’y kumikilos papalapit sa silangang bahagi ng Philippine Sea sa tapat ng Bicol Region.
Ang sentro ng bagyo ay tinatayang nasa 575 kilometro silangan ng Catarman, Northern Samar o 620 kilometro silangan ng Virac, Catanduanes.
Taglay nito ang lakas ng hangin na 150 kilometro bawat oras malapit sa gitna, bugso na umaabot sa 185 kilometro bawat oras.
Kumikilos ito pa-kanluran hilagang-kanluran sa bilis na 30 kilometro bawat oras, habang ang lakas ng hangin mula sa bagyo ay umaabot hanggang 800 kilometro mula sa gitna.
Itinaas na ang Tropical Cyclone Wind Signal No. 3 sa Catanduanes, silangang bahagi ng Camarines Sur, silangang bahagi ng Albay, at hilagang-silangang bahagi ng Sorsogon sa Luzon, gayundin ang hilagang-silangang bahagi ng Northern Samar sa Visayas.
Umiiral naman ang Signal No. 2 sa silangang bahagi ng mainland Cagayan, Isabela, Quirino, Nueva Vizcaya, Aurora, Nueva Ecija, Bulacan, Metro Manila, Rizal, Laguna, Quezon, Marinduque, Camarines Norte, natitirang bahagi ng Camarines Sur, Albay, Sorsogon, Burias Island, at Ticao Island sa Luzon; at natitirang bahagi ng Northern Samar, hilagang bahagi ng Samar, at hilagang bahagi ng Eastern Samar sa Visayas.
Samantala, nakataas ang Signal No. 1 sa Batanes, natitirang bahagi ng Cagayan kasama ang Babuyan Islands, Apayao, Abra, Kalinga, Mountain Province, Ifugao, Benguet, Ilocos Norte, Ilocos Sur, La Union, Pangasinan, Tarlac, Pampanga, Zambales, Bataan, Cavite, Batangas, natitirang bahagi ng Masbate, Romblon, Oriental Mindoro, Occidental Mindoro kasama ang Lubang Islands, Calamian Islands, at Cuyo Islands sa Luzon; at natitirang bahagi ng Samar at Eastern Samar, Biliran, Leyte, Southern Leyte, Bohol, hilaga at gitnang bahagi ng Cebu, hilagang bahagi ng Negros Occidental at Negros Oriental, Guimaras, Iloilo, Capiz, Aklan, at Antique sa Visayas.
Sa Mindanao, kabilang sa mga apektado ang Dinagat Islands, Surigao del Norte, hilagang bahagi ng Agusan del Norte, at hilagang bahagi ng Surigao del Sur. Pinapayuhan ang mga residente sa mga nabanggit na lugar na maghanda laban sa posibleng pagbaha, pagguho ng lupa, at mapanirang hangin.
