Arestado ang isang American national sa ikinasang buy-bust operation ng PNP Drug Enforcement Enforcement Group sa may bahagi ng Castillejos, Zambales.
Kinilala ni PDEG Director P/BGen. Remus Medina ang naaresto na si John Louis May na kilala rin sa alyas na John Louis, 42 anyos, residente ng Tahimik Street, Fiesta Communities Castillejos, Barangay Del Pilar, at part-time construction worker sa nasabing lugar.
Sinabi ni Medina na matagal na nilang minamanmanan ang aktibidad ng nasabing banyaga at naghahanap lamang sila ng magandang pagkakataon.
Naaresto si Louis ng pinagsanib na puwersa ng PDEG, Zambales Police Provincial Office at Castillejos Police Station sa Brgy. Del Pilar.
Nakuha mula sa Kano ang humigit kumulang 50 gramo ng hinihinalang shabu na nagkakahalaga ng P340,000.00 at boodle money na ginamit sa operasyon.
Hawak na ng Special Operations Unit ng Police Regional Office 3 at ng PDEG ang suspek para sa kaukulang dokumentasyon at pagsasampa ng kaso.
Sinabi ni Medina na kanila na ring inaalam kung parte ng isang bigtime drug syndicate ang nasabing Kano.
