Nilinaw ni Acting Senate Sergeant-at-Arms Mao Aplasca na isang pribilehiyo lamang ang protective custody na ipinagkaloob kay Senador Ronald “Bato” dela Rosa at maaari niya umano itong tanggihan anumang oras.
Sa isang panayam, sinabi ni Aplasca na walang kapangyarihan ang Senate security na pigilan ang senador kung nais nitong umalis sa Senado, gaya ng nangyari noong Huwebes ng madaling araw.
Paliwanag pa ng dating police general na hindi nangangahulugang nakaaresto si Dela Rosa habang nasa ilalim ng protective custody ng Senado.
Ayon kay Aplasca, sumusunod lamang ang Office of the Sergeant-at-Arms sa direktiba ni Senate President Alan Peter Cayetano na makikipagtulungan lamang sila sa mga aarestong opisyal kung may dalang judicial order mula sa lokal na hukuman dito sa Pilipinas.
Batay umano sa CCTV footage at ulat ng Senate security, umalis si Dela Rosa sa Senado kasama si Senador Robinhood Padilla.
Aniya, diretsong nagtungo ang dalawang senador sa sasakyan ni Padilla at tahimik na umalis sa compound ng Senado.
Gayunpaman, sinabi ni Aplasca na nagsasagawa pa rin sila ng imbestigasyon kung bakit hindi man lamang kinausap o pinigilan ng mga security personnel ang dalawang senador bago sila makaalis.
