ILOILO CITY- Nilinaw ng Police Regional Office 6 na walang kaugnayan ang kontrobersyal na si Police Lt. Col. Jovie Espenido sa iligal na droga sa Western Visayas.
Sa eksklusibong panayam ng Bombo Radyo Iloilo kay Police Regional Office 6 Director Police Brigadier Gen. Rene Pamuspusan, sinabi nito na ayon sa isinagawang adjudication sa rehiyon, wala silang nakitang validated report na nag-uugnay kay Espenido sa iligal na droga.
Ito ay salungat sa pahayag ni Department of the Interior and Local Government Secretary Eduardo Año.
Kaugnay nito, nilinaw ni Pamuspusan na dapat ay hintayin muna ang resulta ng adjudication process ng national board sa Philippine National Police Headquarters sa Camp Crame.
Sa ngayon, mananatili muna si Espenido sa Regional Personnel and Accounting Unit ng Police Regional Office 6.
