Nagkaroon ng engrandeng homecoming parade si Miss Grand International 2025 Emma Tiglao noong Nobyembre 24 sa Makati City.
Kasama niya sa nasabing parada si Miss Grand International first runner-up Gotchabell Gotchapan at Miss Grand International President Nawat Itsaragrisil. Dumalo rin si Miss Grand International 2024 CJ Opiaza sa homecoming event na ginanap sa One Ayala Activity Center, kung saan nagkaroon din ng press conference.
Ipinahayag ni Emma ang kanyang pasasalamat sa bayanihan ng mga Pinoy pageant fans sa patuloy na pagsuporta sa kanya sa Miss Grand International pageant. Dagdag pa niya, tila naging isang friendly competition ang laban sa pagitan nila ni Gotchabell.
“We just had this healthy competition. We just enjoyed every moment. I’m happy to share not just the room but also the stage with my roomie,” ayon kay Emma.
Sumunod sa yapak ni Miss Grand International 2024 CJ Opiaza si Emma. Matatandaang nakamit ni CJ ang korona matapos magbitiw sa tungkulin si Rachel Gupta mula India, na siyang orihinal na nanalo sa Miss Grand International 2024. Si CJ ang kauna-unahang Pinay na nakakuha ng Miss Grand International crown para sa Pilipinas.
Binanggit naman ni Nawat na wala siyang problema sa mga Filipina beauty queens at masaya siyang makatrabaho ang mga ito.
Babalik si Emma sa Thailand upang gampanan ang kanyang mga responsibilidad bilang Miss Grand International 2025. (Bombo Betha Servito)
