Suportado ng mga lidera mula sa iba’t ibang political groups at power blocs sa Kamara ang inihaing resolusyon ni Speaker Lord Allan Velasco na nagbibigay ng flexibility sa Kongreso na amiyendahan ang anila’y “restrictive” na economic provisions ng 1987 Constitution para makahikayat ng mga foreign investments.
Ayon kay Deputy Speaker at Bagong Henerasyon party-list Rep. Bernadette Herrera, mayroong “strong and united consensus” sa pagitan ng mga political leaders sa Kamara para suportahan ang mithiin ni Velasco na maluwagan ang economic provisions ng Saligang Batas.
Ginawa ni Herrera ang naturang pahayag kasunod ng hybrid meeting na ipinatawag ni Velasco hinggil sa proposed amendments sa Konstitusyon.
Kabilang sa mga physically present sa pulong ay sina Deputy Speakers Mike Romero, Kristine Singson Meehan at Wes Gatchalian; at Representatives Mark Enverga, Kit Belmonte, Francisco Benitez, at Alfredo Garbin.
May ilan namang dumalo sa pulong sa pamamagitan ng video teleconference tulad nina Deputy Speakers Doy Leachon, Robert Puno, Munir Arbison at Eric Martinez.
Nasa video teleconference din sina Majority Leader Martin Romualdez, Minority Leader Joseph Stephen Paduano, Representatives Mikey Arroyo, Isidro Ungab, Robert Ace Barbers, Michael John Duavit, Joet Garcia, Rommel Angara, Franz Alvarez, Eileen Ermita-Buhain, Sharon Garin at Stella Quimbo.
Kinakatawan ng mga kongresistang ito ang mga major political parties at blocs sa kamara, gaya na lamang ng PDP-Laban, Nacionalist People’s Coalition, Nacionalista Party, National Unity Party, Lakas-NUCD, Hugpong ng Pagbabago, Liberal Party, at Party-list Coalition Foundation Inc.
Ginanap ang pulong na ito isang araw bago ang pagsisimula nang pagdinig ng House Committee on Constitutional Amendement sa Resolution of Both Houses No. 2 na inihain ni Velasco sa pagbubukas ng 18th Congress noong Hulyo 2019.
Layon ng resolusyon na ito na amiyendahan ang ilang economic provisions ng Saligang Batas, partikular na ang Articles XII (National Patrimony and Economy), XIV (Education, Science, Technology, Arts, Culture and Sports) at XVI (General Provisions).
Ipapasok ng dito ang parirala na “unless otherwise provided by law” sa ilang sections ng Saligang Batas, na humaharang sa pagmamay-ari ng mga banyaga ng lupain, natural resources, public utilities, educational institutions, media at advertising sa Pilipinas.
