Sa kabila ng kritisismo mula sa publiko, sinigurado ni Senate President Vicente Sotto III na hindi na kakailanganin pang magdeklara ng martial law sa bansa sa oras na maisabatas ang kontrobersyal na anti-terrorism bill.
Karamihan kasi ay tutol sa pagpasa ng Kongreso sa naturang panukala dahil sa takot na maging target ang mga indibidwal na magpapahayag ng kanilang saloobin laban sa gobyerno.
“Ang hinihiling ng Kongreso, kung mapapalitan natin ‘yung Human Security Act, sapagkat ‘yung Human Security Act natin, ‘yung kasalukuyan nating anti-terror bill natin, ito ang pinakamahina sa buong mundo, hindi lang dito sa part ng Asia,” paliwanag ni Sotto sa isang interview.
Dagdag pa ni Sotto, mayroon lamang apat na pagkakataon kung saan maaaring ituring na terorista ang isang tao sa ilalim ng Human Security Act.
Itinanggi rin nito na minadali ang paglusot sa Kongreso ng naturang panukala. Aniya, unang isiylong noong 2018 ang anti-terrorism bill at naaprubahan lamang ito ng Senado ngayong taon.
Kaya lamang daw ito sinertipikahan bilang urgent ni President Rodrigo Duterte ay upang matapos na ng Kongreso ang kanilang deliberasyon tungkol sa panukala bago ito mag-adjourn sa Biyernes.
“Sinabi ni Presidente sa kanila hindi porke ni-certify nang urgent ay minadali. It’s just doing away with the three-day rule,” saad ng senador.
