Inanunsyo ng Land Transportation Office (LTO) na pinalawig muna nila ang bisa ng ilang lisensya at registration na nag-expire simula Hulyo 1, 2026.
Bunsod umano ito nang naranasang downtime at pagbagal ng Land Transportation Management System (LTMS).
Sakop ng extension ang driver’s license, vehicle registrations, conductor’s license, student-driver’s permit, at medical certificate.
Ibig sabihin, ang mga dokumentong nag-expire mula Hulyo 1 ay mananatiling valid hanggang sa susunod na abiso ng LTO.
Nilinaw din ng ahensya na walang ipapataw na late fees o penalties sa mga mag-rerenew na sakop ng extension habang epektibo ang memorandum Circular No. MVL-2026-5271.
Mananatili ang palugit hanggang sa tuluyang maayos ang problema sa LTMS.
Kapag naibalik na sa normal ang sistema, maglalabas ang LTO ng panibagong memorandum para ipatigil ang extension.
