Inamin ni Department of Justice (DOJ) Secretary Jesus Crispin “Boying” Remulla na nananatili pa ring isang malaking problema sa loob ng hanay ng kapulisan ang patuloy na paggamit sa mga indibidwal na nahuhuli sa mga iligal na aktibidad tulad ng kara krus (street gambling) bilang ‘ quota filler.
Ayon kay Remulla ginagawa ito upang mapaganda ang kanilang mga accomplishment report, na siyang iniuulat umano ng mga pulis sa kanilang mga superyor.
Ginawa ng kalihim ang pahayag bilang kanyang tugon sa interpellation o pagtatanong ni Akbayan Party-list Representative Percy Cendaña, sa gitna ng isinasagawang budget deliberation ng House Appropriations Committee para sa Department of Justice (DOJ).
Ayon pa kay Remulla, sa kasalukuyang panahon ay wala pa silang nakukuhang tiyak at konkretong datos kung gaano karami ang mga taong nadadakip at inaresto ng pulisya dahil lamang sa simpleng pagtaya sa kara krus o iba pang mga katulad na uri ng sugal sa kalsada.
Gayunpaman, mariin niyang inamin na ang ganitong sistema ng panghuhuli ay patuloy pa ring pinapayagan at pinapatulan ng ilang tiwaling miyembro ng kapulisan, na nagdudulot ng pagkabahala sa hanay ng DOJ.
Dahil dito, tiniyak ni Remulla na muli niyang iaakyat sa usapan at tatalakayin ang sensitibong isyu na ito kay PNP Chief Jose Melencio Nartatez.
