Nakahanda na ang Philippine National Police (PNP) sa kanilang seguridad para sa inaasahang malaking pagtitipon ng iba’t ibang grupo ng mga tao sa darating na araw ng Linggo, ika-21 ng Setyembre. Ito ay upang masiguro ang kaayusan at kaligtasan ng lahat sa nasabing araw.
Sa isang opisyal na pahayag na inilabas, ipinaabot ni PNP Acting Chief, Police Lieutenant General Jose Melencio Nartatez Jr., ang kanilang paghahanda at ang malawakang deployment ng kanilang mga tauhan.
Ayon sa kanya, halos 50,000 na mga pulis ang kanilang ipakakalat sa iba’t ibang lugar upang magbantay, mamonitor, at higit sa lahat, tiyakin ang seguridad ng lahat ng mga mamamayan.
Dagdag pa ni Nartatez, ang pangunahing layunin ng kanilang pagpapakalat ng mga pulis ay upang protektahan hindi lamang ang mga indibidwal na aktwal na lalahok at makikiisa sa mga aktibidad na isasagawa sa araw na iyon, kundi pati na rin ang pangkalahatang publiko na dumadaan lamang at nagpapatuloy sa kanilang normal na gawain at hindi kasali sa anumang programa o pagtitipon.
Kasama sa mga detalyeng ibinahagi ng PNP ay ang pagpapakalat ng halos 10,000 na mga pulis na nakatalaga sa mga fixed visibility posts sa iba’t ibang strategic locations.
Bukod pa rito, mayroon ding mahigit 1,000 mobile patrol units na maglilibot sa mga pangunahing kalsada at lugar.
Para naman sa daloy ng trapiko, mahigit 3,000 traffic enforcers ang itatalaga upang mamahala at siguruhin ang maayos na daloy ng mga sasakyan. Mayroon ding 9,000 pulis na magbabantay sa mga checkpoints.
Bukod pa sa mga nabanggit, mayroon ding halos 6,000 na tauhan na nakatalaga para sa crowd management upang mapanatili ang kaayusan sa mga lugar na may malaking pagtitipon.
Higit pa rito, mayroon ding mahigit 4,500 na reactionary standby support force na magmumula sa national headquarters ng PNP, kasama rin ang mga reinforcements mula sa Regions 3 at 4A, upang magbigay ng agarang suporta kung kinakailangan.
Para naman sa pagmomonitor mula sa himpapawid, mayroon ding nasa 415 drone operators na magpapatakbo ng mga drones para sa aerial surveillance.
