Pinangunahan ng Department of Social Welfare and Development (DSWD), sa pamamagitan ng Inter-Agency Coordinating and Monitoring Committee (IACMC), ang pagdiriwang ng unang Solo Parents’ Week sa DSWD Central Office sa Quezon City.
Ang Republic Act No. 11861 o ang Expanded Solo Parents Welfare Act ay nagtatadhana na ang ikatlong linggo at ikatlong Sabado ng Abril ay idineklara bilang Solo Parents’ Week at National Solo Parents’ Day.
Ipinaabot ni DSWD Secretary Rex Gatchalian ang kanyang pasasalamat sa mga solo parent na nagbibigay ng nag-iisang pangangalaga at suporta ng magulang sa kanilang mga anak.
Sa nasabing pagdiriwang, binigyan ng certificate of recognition ang DSWD-Central Office Solo Parents’ Support Group bilang pagkilala sa kontribusyon ng grupo sa pagtataguyod ng karapatan ng solo parents, partikular sa mga single parent-employees ng departamento.
Ang DSWD, kasama ang mga field office nito at mga miyembro ng Inter-Agency Coordinating and Monitoring Committee, ay naghanda ng isang linggong kaganapan upang markahan ang unang pagdiriwang ng Solo Parents’ Week at upang maipalaganap ang kamalayan sa pinalakas at pinalawak na batas para sa mga solong magulang.
Ang RA 11861, na inamyendahan sa RA 8972 o ang Solo Parents’ Welfare Act of 2000, ay nagtataguyod ng mga karapatan ng mga Pilipinong solo parents at tinitiyak na sila ay tumatanggap ng sapat na social protection programs mula sa gobyerno.
