Dagsa ang mga mamimili sa pagbubukas ng pinakaunang Kadiwa Store sa rehiyon ng Bicol, kung saan tampok ang pagbebenta ng bigas sa napakamurang halaga na ₱20, o mas kilala bilang “Benteng Bigas.”
Ayon sa Department of Agriculture (DA) Bicol, ang programang ito ay pinangunahan ng Mambalite-Palangon Farmers Irrigated Association (MAPAFIA).
Kinilala ang MAPAFIA bilang kauna-unahang accredited group ng Food Terminal, Inc. sa buong rehiyon, na nagbigay sa kanila ng karapatang magbenta ng NFA rice sa abot-kayang presyo.
Sa pahayag ni MAPAFIA President Florentino Umali, tiniyak niya ang kanilang kahandaan na magbigay ng serbisyo nang walang anumang tubo o kita.
Ang pangunahing layunin nila ay mas maraming Bicolano ang makinabang sa murang bigas at makatulong sa kanilang pang-araw-araw na pangangailangan. Ito ay isang tunay na pagpapakita ng pagmamalasakit sa kapwa.
Samantala, si Libmanan Mayor Edelson Marfil ay nagpaabot ng taos-pusong pasasalamat kay Pangulong Ferdinand Marcos Jr. para sa paglulunsad ng programang Kadiwa.
Binigyang-diin niya ang malaking tulong na naibibigay nito sa kanyang mga nasasakupan.
Tiniyak din niya ang buong suporta ng lokal na pamahalaan (LGU) para sa pagpapatuloy at pagpapalawak ng programang ito sa mga susunod na araw.
