Magpapatupad na ng mas mahigpit na oversight ang Department of Agriculture (DA) sa food supply chain sa pamamagitan ng mandatory registration ng mga warehouses, cold storage facilities, at iba pang agricultural logistics hubs, alinsunod sa Anti-Agricultural Economic Sabotage Act, na may kasamang mas mabigat na enforcement at penalties.
Ayon sa bagong Guidelines for the Registry System for Agri Storage, lahat ng pasilidad na nag-iimbak ng produkto mula sa agrikultura at pangingisda—mapa-owned man, leased, o operated ng third parties—ay dapat magparehistro sa DA Online Registration System.
Saklaw nito ang mga rice warehouses, onion cold storage, meat freezers, grain silos, refrigerated container vans, at agricultural storage tanks para sa lokal at imported na produkto.
Ani Agriculture Secretary Francisco Tiu Laurel Jr., makakatulong ang registry sa pagsugpo sa smuggling, pagpapalakas ng food safety monitoring, at proteksyon sa mga lokal na producer.
Kailangan ding kumpleto at auditable na records sa loob ng limang taon ang mga negosyo, kabilang ang storage capacity, commodities handled, inventory levels, buwanang operational records, at quarterly electronic reports sa mga kaukulang regulatory agencies.
Ang guidelines ay nagtatakda rin ng violations at sanctions. Ang hindi pagpapakita ng required documents kapag hiniling ng awtoridad ay itinuturing na paglabag, habang ang kakulangan sa updated operational reports ay maaaring magsilbing prima facie evidence ng noncompliance.
May karagdagang criminal charges naman para sa digital concealment o manipulation ng records, at maaari ring magresulta sa suspension o revocation ng licenses at registrations kapag nakakasama sa public safety.
Ayon sa DA, layunin ng digital registry na mapabuti ang traceability, mas mapalakas ang food safety oversight, at makalikha ng maaasahang data upang matukoy ang unusual stock accumulation na maaaring senyales ng price manipulation o artificial shortages.
Hindi papalitan ng registration ang licenses o accreditations mula sa mga regulatory bodies tulad ng Bureau of Plant Industry, Bureau of Animal Industry, Bureau of Fisheries and Aquatic Resources, National Meat Inspection Service, Sugar Regulatory Administration, at National Tobacco Administration.
Exempted naman ang micro-scale operators gaya ng sari-sari stores, wet market vendors, home-based enterprises, itinerant peddlers, at certified barangay micro-businesses na may assets na mas mababa sa P3 million.
Para sa medium at large operators, mandatory na ang registration, bilang bahagi ng shift ng DA sa data-driven enforcement at mas mahigpit na monitoring ng agricultural storage operations.
