Pinuna ng Commission on Audit (COA) ang hindi pa nakolektang mahigit P14.4 milyon na foreign travel expenses ng Office of the President (OP) para sa iba’t ibang opisyal ng gobyerno, base sa datos noong Disyembre 2024.
Sakop ng overdue amount ang airfare at hotel ng mga opisyal mula sa national agencies, government-owned or -controlled corporations, at ilang LGUs na sumama sa presidential trips sa China, Japan, Vietnam, Indonesia, Cambodia, Malaysia, Czech Republic, Germany, Belgium, Switzerland, at United States simula 2022.
Kabilang sa hindi pa nagbabayad ang mga opisyal mula sa Board of Investments, Bureau of Internal Revenue, Department of Agriculture, Department of Finance, Department of Foreign Affairs, Department of Information and Communications Technology, Department of the Interior and Local Government, Department of Justice, Department of Migrant Workers, Department of Public Works and Highways, Department of Tourism, at Department of Trade and Industry pati mga kinatawan mula sa Kongreso, Senado, National Security Council, Presidential Communications Office, Presidential Management Staff, Radio Television Malacañang, Senate of the Philippines, at Technical Education and Skills Development Authority, at ilang LGU gaya ng Bacolod, Sultan Kudarat, at Tawi-Tawi.
Ayon sa COA, mahigit dalawang taon na ang iba sa mga hindi nababayarang advance ng OP, at bagama’t nakapagpadala sila ng billing, walang follow-up na naipadala.
Samantala, tiniyak naman ng OP na naglabas na ito ng demand letters sa mga ahensya noon pang Abril 2025 para matugunan ang usapin.
