Pina-pull-out na ng national headquarters ang augmentation force ng Philippine National Police (PNP) na idineploy sa probinsiya ng Batangas.

Ayon kay PNP spokesman B/Gen. Bernard Banac, ipinag-utos na ni PNP chief Gen. Archie Gamboa kagabi ang pullout ng nasa 2,000 mga pulis na nagbibigay seguridad sa mga lugar na apektado ng pagputok ng bulkang Taal.

-- Advertisement --

Sinabi ni Banac ang nasabing hakbang ay pagtalima sa kautusan ni Pangulong Rodrigo Duterte na nag-aalala sa mga kalusugan ng mga pulis dahil nakalanghap na umano ng isang sako ng abo mula sa bulkan ang mga ito.

Epektibo ngayong araw, magbabalik na sa kani-kanilang unit sa Camp Crame ang Reactionary Standby Support Force (RSSF).

Ang mga pulis sa CALABARZON ay mananatiling naka-deploy para umalalay naman sa security at relief operations.