Muling nagbukas ang mga presinto sa Thailand ngayong Linggo para sa isang krusyal na halalan, habang pilit na bumabangon ang bansa mula sa serye ng mga pagkaka-patalsik sa mga lider at pagbuwag sa mga partidong politikal sa loob lamang ng nakalipas na dalawang taon.
Pangunahing hamon para sa susunod na gobyerno ang matamlay na ekonomiya, ang sigalot sa border laban sa Cambodia, at ang lumalalang problema sa transnational cyberscam networks sa Timog-Silangang Asya.
Sa loob lamang ng huling dalawang taon, nasaksihan ng Thailand ang mabilis na pagpapalit ng liderato dahil sa mga desisyon ng korte at koalisyon.
Ang mga naging lider ng Thailand: Srettha Thavisin (Pheu Thai Party), naupo noong Agosto 2023 matapos ang halalan kung saan hinarang ng Senado ang nanalong Move Forward Party.
Gayunpaman, pinatalsik siya ng Constitutional Court noong Agosto 2024 dahil sa isyu ng etika sa pag-appoint ng isang opisyal; Paetongtarn Shinawatra (Pheu Thai Party) ang bunsong anak ng dating lider na si Thaksin Shinawatra.
Pumalit siya kay Srettha noong Agosto 2024 ngunit mabilis ding napatalsik ng korte makalipas lamang ang ilang linggo; Anutin Charnvirakul (Bhumjaithai Party) ang kasalukuyang Prime Minister na naupo noong Setyembre 2024 matapos makuha ang suporta ng parlamento nang mabuwag ang mga naunang alyansa.
Siya ang ikatlong lider ng bansa sa loob ng dalawang taon.
Sa ilalim ng konstitusyong binuo ng militar noong 2017, nananatiling malakas ang kapangyarihan ng mga institusyong hindi inihalal, tulad ng Senado at ng Constitutional Court.
Sa kasalukuyang halalan, inaasahan ang muling matinding negosasyon sa pagitan ng mga partido dahil malabo pa ring may makakuha ng “outright majority” sa harap ng kontroladong sistema ng politika sa Thailand.
