Matagumpay na naisagawa ng Armed Forces of the Philippines (AFP) at Japan Maritime Self-Defense Force (JMSDF) ang ikalawang Bilateral Maritime Cooperative Activity sa West Philippine Sea.
Isa ito sa first major joint activities kasunod ng kamakailang pag-ratipika ng Reciprocal Access Agreement (RAA) sa pagitan ng Pilipinas at Japan.
Nakilahok sa naturang aktibidad ang mga asset ng Pilipinas kabilang ang BRP Miguel Malvar, AW159 anti-submarine helicopter, PAF C-208 ISR aircraft, at Search and Rescue units.
Habang idineploy naman ng Japan ang JS Takanami (DD110) at SH-60K Seahawk helicopter, na nagpamalas ng joint capability sa malawak na serye ng naval operations.
Isinagawa sa naturang aktibidad ang communication check exercise, anti-submarine warfare exercise, cross-deck exercise, Division Tactics and Officer of the Watch Maneuvers (DIVTACS/OOW), Photo Exercises (PHOTOEX), at Finish Exercise (FINEX), na nagpapakita ng seamless interoperability sa pagitan ng dalawang pwersa.
Sa isang statement, sinabi ng AFP na higit pa sa maritime drill, binibigyang diin ng maritime cooperative activity ang pagsasakatuparan ng RAA, isang kasunduan na layuning mapalakas pa ang joint training, humanitarian assistance, and disaster response (HADR) initiatives sa pagitan ng AFP at JSDF.
Samantala, inihayag naman ni AFP Chief of Staff General Romeo Brawner Jr. na ang cooperative activity ay higit pa sa pagpapamalas ng maritime activity kundi pagpapakita din aniya ito ng kanilang hindi natitinag na pangako para mapanatili ang kapayapaan, katatagan at rules-based order sa Indo-Pacific Region.
