Hinihimok ng Philippine Stock Exchange Inc. (PSE) ang Social Security System (SSS) at ang Government Service Insurance System (GSIS), na mas paigtingin pa ang kanilang pakikilahok sa stock market.
Layon ng PSE na hikayatin ang SSS at GSIS na buhayin muli at palawakin ang mga programang pautang na naglalayong suportahan ang stocks investment para sa kanilang milyun-milyong miyembro.
Ayon kay PSE President Ramon Monzon, ang pagsulong na ito ay may mahalagang layunin: ang dagdagan ang liquidity, o ang bilis ng paggalaw ng salapi, at magbigay ng mas malaking sigla sa lokal na merkado ng saping-puhunan.
Sa ilalim ng panukalang ito, ang mga miyembro ng SSS at GSIS ay magkakaroon ng pagkakataong bumili ng piling blue-chip stocks, na kinikilala bilang ilan sa mga pinakamatatag at mapagkakatiwalaang kumpanya sa bansa.
Ang SSS o GSIS ang gaganap bilang trustee hanggang sa ganap na mabayaran ng miyembro ang kanilang inutang na halaga para sa nasabing pamumuhunan.
Bukod pa rito, aktibong isinusulong din ng PSE ang integrasyon ng nasabing programa sa ilalim ng Personal Equity and Retirement Account (PERA).
Ang hakbang na ito ay naglalayong palawakin at dagdagan ang mandatory benefits na tinatanggap ng mga manggagawa sa bansa, na nagbibigay daan upang bumuo ng isang mas matatag at matibay na local bourse o pamilihan ng saping-puhunan.
