Pinaiimbestigahan na ng Department of Justice (DoJ) at sa Bureau of Immigration (BI) ang ilang indibidwal na sinasabing sangkot sa Wirecard scandal na sinasabing nagresulta sa pagkawala ng 1.9 billion Euros o katumbas ng $2.1 billion o mahigit P1.7 trillion.
Ayon kay Justice Sec. Menardo Guevarra, inatasan na rin niya ang National Bureau of Investigation (NBI) na makipag-ugnayan sa Anti Money Laundering Council (AMLC) para malaman kung may indikasyon ng money laundering.
Pero pagbubunyag ni Guevarra, mayroon daw silang nadiskubreng kakaiba sa BI data base pero kailangan daw muna nila itong imbestigahan.
Sa isyu naman kay Jan Marsalek, Chief Operating Officer (COO) ng Wirecard, lumalabas daw sa record ng BI na dumating ito sa bansa noong Marso 3, 2020 at umalis din noong Marso 5.
Pero may mga indikasyon din umanong posibleng bumalik ito sa bansa at posibleng nandito pa sa Pilpinas.
Noong Lunes, itinanggi ng German payment processor Wirecard na COO nila si Marsalek matapos lumabas ang isyung may nawawalang $2 billion sa kanilang balance sheet na hindi naman daw talaga nag-exist.
Ang mga bangko naman sa Pilipinas kabilang ang Bank of the Philippine Islands (BPI) at BDO ay sinabing pineke ang mga dokumento kaugnay ng transaksiyon para magmukhang nasa kanila ang nawawalang pera.
Una nang sinabi na rin ng Bangko Sentral ng Pilipinas (BSP) na ang nawawalang pera na sinasabing idineposito sa dalawang bangko ay hindi nakapasok sa local financial system ng bansa.
