Nanganganib ngayong magbabagong taon ang bawat pamilya sa residential area sa Barangay Addition Hills, Mandaluyong City, matapos sumiklab ang isang sunog nitong Sabado ng gabi, Disyembre 27, ayon sa Bureau of Fire Protection – National Capital Region (BFP-NCR).
Nagsimula ang sunog bandang ala-6:26 ng gabi, at agad itinaas ang ikalawang alarma pagkalipas ng 7 minuto. Pagdating ng 7:14 p.m., itinaas ang ikatlong alarma dahil sa patuloy na paglawak ng apoy.
Ayon sa BFP, nasa 17 BFP fire trucks at 42 fire trucks mula sa volunteers ang rumesponde sa sunog bago ideklarang fire out bandang alas-9:04 ng gabi.
Aabot naman sa 100 pamilya o 600 indibidwal ang apektado habang tinatayang P375,000 ang iniwang pinsala ng sunog.
Tatlo ang naiulat na sugatan, dalawang babaeng residente at isang lalaking fire volunteer.
Sa paunang impormasyon, may matandang lalaki ang nawawala, na kalaunan ay nakaligtas ayon sa BFP.
Inaalam pa ang naging sanhi ng sunog.
Samantala isa ring sunog ang naitala sa Barangay 130, Pasay City, nitong Sabado ng hapon.
Ayon sa inilabas na situational report ng BFP-NCR nagsimula ang sunog bandang alas-2:00 ng hapon at mabilis na itinaas ang unang alarma pagkalipas ng 14 minuto.
Idineklarang fire out ang sunog sa dakong alas-4:20 ng hapon.
Tatlong katao naman ang iniulat na nasugatan sa insidente, ngunit wala pang ibang detalye ang ibinibigay ng mga awtoridad hangang sa mga oras na ito.
