Tiniyak ni Senate President Tito Sotto III na ligtas ang mga dokumento ng Senado matapos ang naitalang sunog sa Senate building nitong Linggo ng umaga.
Siniguro ni Sotto na hindi naapektuhan ng sunog ang lahat ng mahahalagang dokumento ng Senado, kabilang ang mga hawak ng Blue Ribbon Committee.
Sinabi ni Sotto, naiulat ang insidente sa Bureau of Fire Protection (BFP) dakong 6:30 a.m. at ang apoy ay nagsimula sa ikatlong palapag, partikular sa tanggapan ng Legislative Technical Affairs Bureau.
Agad na rumesponde ang mga bumbero at idineklarang under control ang sunog pagsapit ng 7:43 a.m.
Patuloy namang iniimbestigahan ng mga awtoridad ang sanhi ng sunog at ina-assess ang lawak ng pinsala.
Dahil sa paggamit ng tubig sa pag-apula ng apoy, nagkaroon ng tagas pababa sa Session Hall, na nagmula sa apektadong palapag.
Katuwang ng Senado ang BFP at internal security sa pagpapatupad ng karagdagang hakbang para sa kaligtasan ng gusali at ng mga empleyado upang maiwasan ang kahalintulad na pangyayari.
Ayon pa sa Senado, ang maintenance team ay magtatrabaho nang 24 oras upang matuyo at maisaayos ang Session Hall at matiyak na handa ito para sa sesyon, bukas Lunes.
