Naitala ang pinakamababang voter turnout sa sampung state sa East Coast ng U.S. na nasasakupan ng New York Consulate, kung saan 2,500 lamang sa 31,990 na rehistradong overseas voters ang nakaboto gamit ang bagong online voting system—katumbas ng humigit-kumulang 7.81%.
Ayon kay New York Consul General Senen Mangalile, na siya ring acting chairman ng Special Board of Election Inspectors, naging pangunahing problema ang kakulangan sa impormasyon at mga isyu sa sistema. Sinabi niyang ginawa ng konsulado ang lahat ng paraan upang ipaalam sa mga botante ang bagong sistema ngunit hindi sapat ang isang buwan para rito.
Nangunguna sa mga kandidatong sinusuportahan ng mga botante sa East Coast sina dating Senador Bam Aquino, Kiko Pangilinan, Bong Go, Bato Dela Rosa, Ping Lacson, Tito Sotto, at iba pa. Bukod pa rito, nakakuha rin ng suporta ang ML Partylist ni dating Senador Leila de Lima.
Sinabi pa ni Mangalile na magkakaroon ng masusing assessment sa buong online voting process, at ipapasa ito ng Department of Foreign Affairs sa Commission on Elections para sa kaukulang aksyon.
