Aabot sa siyam na mga senador na magsisilbing senator-judges sa impeachment trial ni Vice President Sara Duterte ang dati nang lumahok sa mga naunang impeachment proceedings sa bansa.
Kabilang dito sina Sen. Loren Legarda at Sen. Vicente “Tito” Sotto III sa mga naging senator-judges sa impeachment trial ni dating Pangulong Joseph Estrada mula Disyembre 2000 hanggang Enero 2001.
Lumahok din sila sa impeachment trial ni dating Chief Justice Renato Corona mula Disyembre 2011 hanggang Mayo 2012.
Samantala, kabilang din sa mga naging bahagi ng paglilitis kay Corona sina Sens. Alan Peter Cayetano, Pia Cayetano, Francis Escudero, Jinggoy Estrada, Panfilo Lacson, Lito Lapid, at Francis Pangilinan. Lahat sila ay bumoto noon pabor sa conviction ni Corona.
Naging senator-judge rin noon si Pangulong Ferdinand Marcos Jr. sa impeachment trial ni Corona. Kasama nina dating senador Joker Arroyo at yumaong Sen. Miriam Defensor-Santiago, bumoto siya para sa acquittal ng dating punong mahistrado.
Bukod sa mga senador, naging bahagi rin ng mga naunang impeachment proceedings ang ilang personalidad na sangkot ngayon sa paglilitis kay Duterte.
Si Sen. Risa Hontiveros, na noon ay kinatawan ng Akbayan Party-list, ay naghain ng graft complaint laban kay Corona sa Office of the Ombudsman.
Samantala, si Mamamayang Liberal Party-list Rep. Leila de Lima, na nagsisilbing miyembro ng House prosecution panel, ay justice secretary noong impeachment trial ni Corona.
Noon, tumestigo siya kaugnay ng isyu sa temporary restraining order na may kinalaman sa travel ban laban kay dating Pangulong Gloria Macapagal Arroyo.
Hindi naman makikibahagi si Sen. Jinggoy Estrada sa impeachment trial ni Vice President Duterte matapos siyang suspendihin ng Office of the Ombudsman nang anim na buwan kaugnay ng kanyang pagkakasangkot sa kasong plunder.
