Tiniyak ni House Appropriations Committee Chair Mika Suansing na mayroong nakapaloob na mahalagang probisyon sa panukalang 2026 national budget.
Ayon kay Suansing, ito ay isang special provision, partikular na Section 78 ng General Provisions, na naglalayong pigilan ang anumang uri ng pamumulitika sa pamamahagi ng tulong pinansyal, maging ito ay cash o non-cash.
Kabilang sa mga programang sakop ng probisyong ito ang Assistance to Individuals in Crisis Situation (AICS), Medical Assistance to Indigent Patients (MAIP), Tulong Panghanapbuhay sa Ating Disadvantaged/Displaced Workers (TUPAD), at lahat ng iba pang programa na may kahalintulad na layunin at pamamaraan ng pagbibigay ng ayuda sa mga nangangailangan.
Dagdag pa ni Suansing, kasama rin sa ipinagbabawal ng probisyong ito ang paggamit ng “guarantee letter”.
Layunin nito na maiwasan ang tinatawag na patronage politics, kung saan nagkakaroon ng paboritismo at impluwensya ang mga politiko sa pagpili ng mga makakatanggap ng tulong.
Sa madaling salita, ang ibig sabihin nito ay hindi na papayagan ang mga politiko na makialam o magkaroon ng anumang kapangyarihan sa proseso ng pagkuha ng tulong-pinansyal mula sa gobyerno.
Layunin ng probisyon na maging patas at walang kinikilingan ang pamamahagi ng ayuda sa lahat ng mga karapat-dapat na benepisyaryo.
