CAUAYAN CITY- Inaresto sa isinagawang drug buybust operation ang isang helper matapos umanong magbenta ng shabu sa Santiago City
Sa nakuhang impormasyon ng Bombo Radyo Cauayan sa Presinto Uno, ang suspect ay si Elmer Agustin, 28 anyos, helper na residente ng Barangay Nagassican, Lungsod ng Santiago.
Batay sa ulat ng Presinto Uno, magkatuwang ang kanilang puwersa, mga kasapi ng Station Drug Enforcement Unit, City Drug Enforcement Unit, Regional Drug Enforcement Unit at PDEA Region 2 na nagsagawa ng operasyon na nagresulta sa pagkakadakip ng suspect.
Bitbit ang isang pakete ng hinihinalang shabu, nakipag-transaksyon di umano si Agustin sa isang pulis na nagpanggap na poseur buyer.
Mariin namang tinanggi ni Agustin na sangkot siya sa operasyon ng illegal na droga.
Kanya pang sinabi na handa siyang sumailalim sa drug test upang patunayang hindi siya gumagamit ng droga.
Ayon naman sa Presinto Uno, ang suspect ay kabilang sa regional target list bilang priority 10 high value individual na mahaharap sa Kasong paglabag sa Republic Act 9165 (Comprehensive Dangerous Drugs Act of 2002).
Si Agustin ay nasa pangangalaga na ng Santiago City Custodial Facility.
