CAUAYAN CITY- Nahaharap sa paglabag sa Republic Act 9165 (Comprehensive Dangerous Drugs Act of 2002) at Republic Act 10591 ( Comprehensive Law on Firearms and Ammunition) ang isang tsuper at kanyang helper makaraang nahuli sa isinagawang drug buybust operation sa barangay Magdalena, Cabatuan, Isabela
Ang mga nadakip ay ang tsuper na si Arce Macanas, 37 anyos , may-asawa , residente ng Plaza, Aparri, Cagayan at kanyang helper na si Edwin Lofredo, 19 anyos, binata at residente ng Caagaman, Aparri, Cagayan.
Sa isinagawang drug buy bust operation ng mga kasapi ng Cabatuan Police Station ay nasamsam kay Macanas ang 6 na sachet na naglalaman ng hinhihinalang shabu at nakuha naman kay Lofredo ang isang sachet.
Sa nakuhang impormasyon ng Bombo Radyo Cauayan, tinangkang tumakbo ni Macanas ngunit nahuli ng mga pulis.
Si Macanas ay naunang nakalaya matapos isailalim sa probation sa kasong may kaugnayan sa illegal na droga noong 2018 ngunit muling nadakip sa bayan ng Cabatuan dahil pa rin sa illegal na droga.
Nakuha din sa kanilang pag-iingat ang isang sumpak o improvised shotgun.
