Nakahanda na ang Department of Health (DOH) para sa pagdaraos ng Traslacion sa taong 2026.
Ito ay upang masiguro ang kaligtasan at kalusugan ng mga debotong lalahok sa naturang taunang prusisyon.
Ayon kay Health Secretary Ted Herbosa, bilang paghahanda, mahigit sa 200 Health Emergency Response Teams ang bubuuin mula sa iba’t ibang ospital na nasa ilalim ng DOH.
Ang mga nasabing grupo ay ipakakalat sa kahabaan ng ruta ng prusisyon upang agad na makapagbigay ng serbisyong medikal sa mga mangangailangan.
Kaugnay nito, pinaalalahanan ni Secretary Herbosa ang publiko, partikular na ang mga may karamdaman at mga nakatatanda, na maging handa at magdala ng kanilang maintenance medicine para sa kanilang mga kondisyon.
Bukod pa rito, mahalaga rin na magdala sila ng sapat na tubig upang manatiling hydrated, pagkain upang may makain sa panahon ng prusisyon, at komportableng damit upang hindi mahirapan sa kanilang paglalakad.
Hinihimok din niya ang lahat na alamin ang lokasyon ng pinakamalapit na medical station sa kanilang kinaroroonan upang madali silang makahingi ng tulong kung kinakailangan.
Nauna nang ipinaalam ng Quiapo Church sa publiko na may mga kalsada na pansamantalang isasara upang bigyang daan ang mga medical team at iba pang mga emergency personnel.
Ito ay upang masiguro na mabilis silang makatugon sa anumang insidente o pangangailangan medikal.
