Magpapatuloy ang paghahanda ni Alex Eala para sa French Open sa pamamagitan ng dalawang sunod na torneo sa Italy matapos ang produktibong kampanya sa Spain.
Matapos umabot sa second round ng singles at doubles sa Mutua Madrid Open nitong weekend, sinabi ng 20-anyos na Filipina tennis star na determinado siyang bumalik nang mas malakas.
Bago ito, magkakaroon muna si Eala ng isang linggong pahinga bago sumabak sa Internazionali BNL d’Italia sa Rome mula Mayo 5 hanggang 17.
Isa itong WTA 1000-level tournament, isa sa pinakamalalaking events bago ang French Open.
Kasama rin si Eala sa listahan ng mga lalahok sa Parma Ladies Open sa Parma mula Mayo 12 hanggang 17, ngunit nakadepende pa ang kanyang paglahok doon sa magiging takbo ng kampanya niya sa Rome.
Ang mga clay-court tournaments na ito ang magsisilbing huling paghahanda ni Eala para sa French Open na gaganapin mula Mayo 24 hanggang Hunyo 7 sa Paris.
Si Eala, na nagtapos sa Rafael Nadal Academy, ay nakalaro na sa tatlong clay tournaments ngayong season bilang paghahanda.
Gayunman, hindi pa siya nakalalagpas ng second round sa bawat torneo.
Sa Madrid Open, natalo siya sa second round kay Elise Mertens ng Belgium, 6-2, 6-1.
Sa doubles naman, natalo sila ng Turkish partner niyang si Zeynep Sonmez laban kina Katerina Siniakova at Taylor Townsend, 6-1, 7-5.
Sa kasalukuyan, nasa No. 44 si Eala sa world rankings at target niyang muling umakyat matapos maabot ang career-best No. 29 noong nakaraang buwan.
