Tiniyak ng Philippine Charity Sweepstakes Office (PCSO) na may bubong na masisilungan ang may 70 young cancer patients ngayong Pasko.

Ayon kay PCSO chairperson Margie Juico, napili na nito ang ang facility malapit sa East Avenue Medical Center sa Quezon City na paglilipatan ng Center for Life Improvement and Health Development (CHILD) House Project.

Ang CHILD House ay proyekto ng Ricky Reyes Foundation na nagkakanlong sa mga batang may sakit na kanser.

Dito libreng nakatira ang mga pasyente kung saan ang PCSO ay nagbibigay ng P1.7 million taon-taon na pondo para sa operasyon nito, maliban pa ang medical at financial assistance sa mga indigent patients, lalo na ang mga galing ng probinsiya.

Naging sentro ng batikos ang kasalukuyang namamahala ng PCSO matapos na hindi na nito ni-renew ang kontrata ng compound kung saan nakatayo ang halfway house.

Pero nilinaw naman ni Juico na kaya umano sila naghahanap ng ibang malilipatan dahil masyado nang luma at hindi na ligtas para sa mga cancer patients ang gusaling kanilang tinitirhan.

Una rito, mismong ang Pangulong Noynoy Aquino na ang nagbigay ng direktiba kay Juico na tiyaking may masisilungan ang mga nakatira sa halfway house.